Nesti
Foreldrar eru hvattir til að útbúa gott nesti fyrir börnin sín, t.d. smurt brauð og ávexti en láta kex, kökur eða önnur sætabrauð sitja á hakanum.

Gert er ráð fyrir að börnin drekki mjólk með nestinu sínu eða þá vatn. Mjólk er hægt að fá keypta í skólanum með því að sækja um slíkt í sama kerfi og þegar panta skal skólamáltíðir. Sama gildir um ávexti (svokallaða hressingu). Skoða bækling um nesti hér.

Námsbækur
Skólinn sér nemendum fyrir námsbókum. Grunnbækur fá nemendur lánaðar en verkefnabækur ýmis konar fá nemendur til eignar.

Mikilvægt er að vel sé með námsbækur farið. Grunnbækurnar þurfa að endast í nokkur ár, þannig að vera þeirra í töskum nemenda má ekki valda því að þær verði svartar og sóðalegar á stuttum tíma.

Góð meðferð á námsbókum er mikilvæg svo að skólinn geti keypt inn nýtt námsefni og endurnýjað bókakost sinn með eðlilegum hætti. Vert er að benda á að illa umbúið nesti, lausir litir, tunnuyddarar o.fl. hafa eyðilagt margar bækur. Foreldrar eru því beðnir að sjá til þess að vel sé um slíka hluti búið, þannig að þeir skemmi ekki út frá sér.

Týni nemandi eða skemmi bók þarf hann að öllu jöfnu að greiða fyrir nýja.