Skólahjúkrun

Bjarnheiður Böðvarsdóttir, Heilsugæsluhjúkrunarfræðingur 

vallaskoli@hsu.is

480 5800

 

Viðvera:

Mánudagar: 8:00 - 12:00

Þriðjudagar: 8:00 - 12:00

Miðvikudagar: 8:00 - 16:00

Fimmtudagar 8:00 - 16:00

Föstudagar: 8:00 - 12:00

 

Viðtalstímar eftir samkomulagi.

 

Heilsuvernd skólabarna er hluti af heilsugæslunni og framhald af ung- og smábarnavernd. 

Markmiðið er að efla heilbrigði nemenda og stuðla að vellíðan þeirra. Starfsfólk heilsuverndar skólabarna vinnur í náinni samvinnu við foreldra, skólastjórnendur, kennara og aðra sem koma að málefnum nemenda með velferð þeirra að leiðarljósi. Farið er með allar upplýsingar sem trúnaðarmál.

Þjónusta heilsuverndar skólabarna er skráð í rafræna sjúkraskrá heilsugæslunnar. 

Helstu áherslur í heilsuvernd skólabarna eru forvarnir, fræðsla, skimanir og bólusetningar. 

Unnið er samkvæmt leiðbeiningum Þróunarmiðstöðvar íslenskrar heilsugæslu og Embættis landlæknis um heilsuvernd grunnskólabarna. 

Heilbrigðisfræðsla 

Skipulögð heilbrigðisfræðsla er veitt í öllum árgöngum og er áherslan á að hvetja til heilbrigðra lífshátta. Eftir fræðslu fá foreldrar upplýsingar í tölvupósti um fræðsluna. Þá gefst þeim kostur á að ræða við börnin um það sem þau lærðu og hvernig hægt er að nýta það í daglegu lífi. 

  1. bekkur – ‚Líkaminn minn‘ - Forvörn gegn kynferðislegu ofbeldi og Hjálmanotkun
  2. bekkur – Tilfinningar
  3. bekkur – Verkefnabók um 6H heilsunnar (Hamingja, Hollusta, Hreinlæti, Hreyfing, Hvíld)
  4. bekkur – Kvíði og Slysavarnir
  5. bekkur – Samskipti
  6. bekkur – Kynþroski og Endurlífgun
  7. bekkur – Bólusetningar
  8. bekkur – Sjálfsmynd-Samskipti, Hugrekki og Endurlífgun
  9. bekkur – Kynheilbrigði og Bólusetning
  10. bekkur – Geðheilbrigði, Endurlífgun og Ábyrgð á eigin heilsu

Markmið hverrar fræðslu eftir árgöngum er hægt að sjá á Heilsuvera.is 

Skimanir 

Skimað er fyrir ákveðnum heilbrigðisvandamálum og eru skimanir framkvæmdar í 1., 4., 7. og 9. bekk. Þær felast í mælingu á hæð, þyngd og sjónskerpu. Nemendur í öðrum árgöngum eru skimaðir eftir þörfum. Ef frávik reynist í skimun er ávallt haft samband við forráðamann. 

Heilsueflandi viðtöl um lífsvenjur og líðan 

Þegar skimanir fara fram í 1., 4., 7. og 9. bekk ræðir skólahjúkrunarfræðingur við nemendur um líðan og lífsvenjur. Markmið viðtalanna er að styrkja vitund nemenda um eigið heilbrigði og líðan. Einnig að geta gripið til úrræða ef vart verður við vanlíðan eða áhyggjur. 

Bólusetningar 

Bólusetningum er ætlað að verja einstaklinginn gegn alvarlegum smitsjúkdómum. 

Í 7. bekk er bólusett við mislingum, hettusótt og rauðum hundum (ein sprauta), auk þess eru stúlkur og drengir bólusett gegn HPV (Human papilloma veirum) sem geta valdið leghálskrabbameini. 

HPV bólusetning er gefin tvisvar með 6 mánaða millibili. 

Í 9. Bekk er bólusett við barnaveiki, stífkrampa, kíghósta og mænusótt (ein sprauta). 

Áður en kemur að bólusetningu er sendur tölvupóstur til foreldra með upplýsingum um tímasetningu. Gott er að nemendur komi með bólusetningarskírteini sín í skólann þegar bólusetning fer fram. 

Hafið samband við skólahjúkrunarfræðing ef: 

  • Nánari upplýsinga er óskað
  • Talið er að barn sé ekki að fullu bólusett
  • Óskað er eftir því að barn sé ekki bólusett

Það er á ábyrgð foreldra að láta bólusetja börn sín. 

Hagnýtar upplýsingar 

Tannheilsa

Mikilvægt er að foreldrar fari með börn sín í reglubundið eftirlit til tannlæknis. Almannatryggingar taka þátt í kostnaði vegna tannlækninga barna að 18 ára aldri. Skráning hjá heimilistannlækni í Réttindagátt SÍ (www.sjukra.is) er forsenda greiðsluþátttöku SÍ og tryggir börnum gjaldfrjálsa tannlæknisþjónustu.

Veikindi og slys 

Ef óhapp eða slys verður á skólatíma sér starfsfólk skólans um fyrstu hjálp. Þurfi nemandi að fara á heilsugæsluna eða slysadeild skulu foreldrar fara með barninu. Því er mikilvægt að skólinn hafi öll símanúmer þar sem hægt er að ná í þá á skólatíma barnsins. Ekki er ætlast til að óhöppum sem gerast utan skólatíma sé sinnt af heilsuvernd skólabarna. 

Langveik börn 

Mikilvægt er að skólahjúkrunarfræðingur viti af börnum sem eru með fötlun eða langvinnan og/eða alvarlegan sjúkdóm, s.s. sykursýki, ofnæmi, flogaveiki, blæðingarsjúkdóma eða aðra alvarlega sjúkdóma. Hlutverk skólahjúkrunarfræðingsins er að skapa þessum börnum viðeigandi aðstæður og umönnun í skólanum í samvinnu við foreldra og starfsfólk skólans. 

Lyfjagjafir

Samkvæmt tilmælum landlæknis um lyfjagjafir í grunnskólum eru sérstakar vinnureglur varðandi lyfjagjafir til nemenda á skólatíma. Foreldrar þurfa að skrifa undir blað þar sem óskað er eftir að barn fái lyf á skólatíma. Best er að hafa beint samband við hjúkrunarfræðing ef barn þarf lyf á skólatíma og hann setur málið í réttan farveg.

Höfuðlús 

Höfuðlús birtist reglulega í skólum landsins og er mikilvægt að foreldrar kembi hár barna sinna reglulega yfir skólaárið. Rétt er að láta skólann vita ef lús finnst í hári barns og skólahjúkrunarfræðingur getur leiðbeint varðandi lúsasmit. 

Líðan barna

Til að njóta sín í námi verður barninu að líða vel í skólanum. Heilsuvernd skólabarna hvetur foreldra til að vera vakandi yfir líðan barna sinna og spyrja þau reglulega um líðan sína. Einnig að hafa hugfast að hrós og hvatning styrkja jákvæða hegðun og auka vellíðan. Foreldrar geta ávallt leitað ráðgjafar hjá skólahjúkrunarfræðingi varðandi málefni er varða líðan og heilbrigði barnsins.

Útivistatími

Að gefnu tilefni viljum við vekja athygli á því að í 92. gr barnaverndarlaga nr. 80/2002 er fjallað um ÚTIVISTARTÍMA BARNA. Þar segir:

  • Börn, 12 ára og yngri, mega ekki vera á almannafæri eftir klukkan 20.00 nema í fylgd með fullorðnum.
  • Börn, sem eru á aldrinum 13 til 16 ára, skulu ekki vera á almannafæri eftir klukkan 22.00, enda séu þau ekki á heimferð frá viðurkenndri skóla-, íþrótta- eða æskulýðssamkomu.
  • Á tímabilinu 1. maí til 1. september lengist útivistartími barna um tvær klukkustundir, þ.e. til 22.00 fyrir 12 ára og yngri en til 24.00 fyrir 13 til 16 ára.
  • Aldursmörk þessa ákvæðis miðast við fæðingarár en ekki fæðingardag.

Tenglar

Heilsuvera 

Embætti landlæknis

Um heilsuvernd grunnskólabarna

Saman hópurinn