Mál- og hreyfiþjálfun

Við upphaf skólagöngu getur verið talsverður þroskamunur á nemendum. Til að jafna þennan mun er m.a. boðið upp á mál- og hreyfiþjálfun sem miðar að því að örva þroska nemenda til að takast á við félagsleg samskipti og formlegt nám. 

Í skólabyrjun er gerð skimun á nemendum í 1. bekk með könnun á skyn-, hreyfi-, félags- og málþroska. Þær upplýsingar sem skimunin veitir eru notaðar til þess að ákveða hverjir njóta þessarar kennslu til lengri tíma. Niðurstöðurnar eru kynntar foreldrum og ákvörðun um þátttöku í mál- og hreyfiþjálfun tekin í samráði við þá. Ef grunsemdir vakna um þroskafrávik eru foreldrar hvattir til að leita til sérfræðinga. 

Námstilboðið skiptist í mál- og hreyfiþjálfun fyrir 1.–3. bekk. Markmið þessa námstilboðs er að efla hreyfi-, mál- og félagsþroska. Með því er reynt að auka færni nemenda á sem flestum sviðum og gera þá þannig hæfari til að takast á við lífið og tilveruna.